E drejta civile është një nga disiplinat e formimit karakterizues dhe profesional të programit të studimeve të nivelit të parë. Ky kurs ka për qëllim të familjarizojë studentët me strukturën bazë dhe përmbajtjen e të drejtës civile. Në këtë lëndë do të trajtohen parimet themelore të së drejtës private si dhe institutet bazë të së drejtës civile. Lënda fillon me kuptimin e të drejtës në përgjithësi e më pas përqëndrohet në trajtimin e pjesës së përgjithshme të Kodit Civil duke analizuar institutet e të drejtës civile si personat fizikë, personat juridike dhe llojet e tyre.

Një analizë e detajuar u bëhet instituteve të përfaqesimit, veprimeve juridike, parashkrimit, pronësisë dhe trashëgimisë. Kjo analizë jepet nëpërmjet interpretimit të hollësishëm të përmbajtjes së dispozitave te Kodit Civil. Kuptimi i normave juridike të përmbajtura ne Kodin Civil jepet edhe nën këndvështrimin e praktikës gjyqësore shqiptare në kushtet e reja sociale të zhvillimit të shoqërise shqiptare duke konsideruar edhe realitete të paparashikuara nga legjislatori në kohën e hartimit te Kodit Civil.