Procedura Penale e Avancuar me praktikë gjyqësore, është lënda mësimore e cila shpjegon nga ana teorikie dhe praktike legjislacionin procedurial penal, institutet dhe dispozitat që rregullojnë procedimin penal në të gjitha fazat e tij. Ajo analizon shkencërisht sistemet proceduriale penale, zhvillimin historik të legjislacionit procedurial në Shqipëri deri në miratimin e Kodit të Ri të Procedurës Penale, si dhe parimet demokratike në të cilat bazohet procedimi penal. Analiza e përcaktime të hollësishme bëhen për subjektet e procedimit penal, për vendin që zënë, rolin që luajnë dhe raportet midis tyre; për kuptimin, llojet dhe çmuarjen e provave; kushtet dhe kriteret që duhen zbatuar në marrjen e masave të sigurimit; detyrat e prokurorit dhe të policisë gjyqësore gjatë fazës së hetimeve paraprake; rregullat e gjykimit në shkallë të parë; kuptimin dhe veçoritë e gjykimit në apel si dhe në Gjykatën e Lartë; mënyrën e ekzekutimit të vendimeve të formës së prerë; marrëdhëniet juridiksionale me autoritetet e huaja etj. Programi është ndërtuar në përputhje me strukturën e Kodit të Procedurës Penale dhe për leksione të caktuara parashikon seminare teoriko- praktike, në të cilat diskutohen përmbajtja e lëndës, lidhur me praktikën gjyqësore, duke u konkretizuar me vendimet e Gjykatave të Rretheve Gjyqësore dhe të Apeleve; vendimet e Kolegjit Penal të Gjykatës së Lartë, vendimet Unifikuese të Kolegjeve të Bashkuara të Gjykatës së Lartë; vendimet e Gjykatës Kushtetuese, si dhe vendimeve të GJEDNJ, për çdo parim apo dispozitë të trajtuar gjatë leksioneve. Studentët do të kenë mundësinë që të debatojnë rreth këtyre vendimeve mbi parimet dhe dispozitat konkrete të sanksionuara në Kodin e Procedurës Penale.

Objektivi kryesor është që në mbarim të ciklit të leksioneve studentët të kenë një infomacion të gjerë jo vetëm teorik por edhe të kuptojë në mënyrë praktike si gjejnë zbatim parimet e sanksionuara në Kodin e Procedurës Penale. Përgatitja e juristëve të ardhshëm me njohuri të zgjeruara në fushën e procesit penal në përputhje me standardet ndërkombëtare të vendosura për këtë qëllim, të aftë për dhënien e drejtësisë në luftën kundër kriminalitetit, duke respektuar të drejtat e njeriut. Rritja e nivelit të formimit teorik të tyre nëpërmjet njohjes me të thelluar të mendimit të përparuar bashkëkohor për ndarjen e pushteteve, sistemet proceduriale, parimet dhe institutet kryesore të procedimit penal etj. Kuptimin e drejtë të vendit që zenë dhe rolit që luajnë subjektet e procedimit penal, raportet midis tyre, të drejtat dhe detyrimet që kanë dhe mënyra e realizimit te tyre në praktike.