Dy cështje themelore debatohen vashdimisht në nivel global: Pse kombet luftojnë dhe pse ato bashkëpunojnë me njeri tjetrin? Një teori e gjith-përhapur (realizmi) prezanton konfliktin si një sjellje normale në problematikat ndërkombëtare. Një tjetër teori (liberalizmi) karakterizon bashkëpunimin si një normë sjellje në raportet ndërkombëtare. Kjo lëndë është projektuar që t’i prezantoj studentëve njohuritë bazë që kërkohen për të kuptuar marrëdhëniet ndërkombëtare dhe organizatat kryesore ndërkombëtare. Pra, kjo lëndë trajton rolin e organizatave ndërkombëtare në institucionalizimin e bashkëpunimit në marrëdhëniet ndërkombëtare. Studentët do ta nisin lëndën duke shqyrtuar disa aspekte teorike të nevojshme për të kuptuar marrëdhëniet ndërkombëtare. Në këndvështrimin teorik ne do të shpjegojmë elementët bazë të teorive realiste, liberale dhe konstruktiviste. Më tej, ne do të bëjmë një analizë të krahasuar të teorive kryesore në marrëdhëniet ndërkombëtare. Kjo konsiderohet e rëndësishme për të paisur studentët me aftësi diagnostikuese të nevojshme për të kuptuar dhe studiuar organizatat kryesore ndërkombëtare. Gjatë zhvillimit të lëndës ne do të shpjegojmë origjinën historike të organizatave kryesore ndërkombëtare, mënyrën se si ato janë strukturuar dhe funksionet bazë të tyre. Më tej, ne do të shqyrtojmë ndikimin e aktorëve lokal dhe ndërkombëtar ndaj organizatave ndërkombëtare. Mbasi të shpjegojmë qëllimin, arritjet dhe dështimin e Lidhjes së Kombeve ne do të analizojmë organizatat kryesore ndërkombëtare që u krijuan mbas Luftës së Dytë Botërore. Me mbarimin e lëndës studentët do të zotërojnë instrumentat analitikë dhe konceptualë të nevojshëm për të kuptuar sjelljen e aktorëve kryesorë në sistemin ndërkombëtar. Qëllimi final i lëndës është paisja e studentëve me dije të qëndrueshme lidhur me funksionimin e organizatave kryesore ndërkombëtare.

Qëllimi final i lëndës është që të rrisi njohuritë e studentëve lidhur me aftësinë e tyre për të njohur dhe analizuar organizatat ndërkombëtare. Në përfundim të trajtimit të lëndës studentët mastër do të zotërojnë: 1. një njohuri të qëndrueshme të teorive kryesore të marrëdhënieve ndërkombëtare dhe vecoritë e tyre 2. një kuptim të plotë pse organizata të ndryshme ndërkombëtare ekzistojnë 3. një njohuri të plotë për organizatat kryesore ndërkombëtare 4. një njohuri të kënaqshme lidhur me mënyrat se si organizatat ndërkombëtare influencojnë iniciativat e shteteve 5. një aftësi të konsiderueshme për të kuptuar mundësitë në dispozicion të organizatave ndërkombëtare 6. një njohuri të konsoliduar që do t’i bëjë studentët të aftë të projektojnë dhe ekzekutojnë një projekt lidhur me organizatat ndërkombëtare.