Lënda E Drejta Penale e Krahasuar ka si qëllim t’u shërbejë studentëve dhe juristëve, për t’i pajisur ata me kulturën e institucioneve dhe instituteve të së drejtës penale të vendeve të ndryshme . Studimi i kësaj disipline , përbën një parakusht për të kuptuar dhe paraprirë evolucionin e së drejtës së brendshme. Trualli në të cilën operon kjo disiplinë janë legjislacionet penalo – proceduriale tëhuaja . Studimet e krahasuara përbëjnë bazën e njohjes së ligjit të huaj dhe për pasojë të përmirësimit e unifikimit të tendencave pozitive në zhvillimet e ndryshme legjislative. Në kuadrin e kësaj disipline, pasqyrohen në mënyrë kronologjike procesi i lindjes dhe zhvillimit të traditave të ndryshme ligjore në lëmin penal. Studimet e krahasuara kanë filluar të zhvillohen jo shumë hershëm dhe nuk kanë rreshtur deri në ditët tona kur prirja e integrimit sidomos për Shqipërinë , ngre në rend të ditës standarte të krahasueshme me anëtarët e tjerë komunitarë që përbëjnë atë që në terma të tjerë njihet si “Evropa Juridike”. Kjo disiplinë tenton të krijojë një tablo të qartë të sistemeve kryesore të së drejtës penale në Evropë e më gjerë.

Kursi i të Drejtës Penale të Krahasuar synon të familjarizojë studentët me elemente fondamentale e të thelluara të procesit të krahasimit. Në përfundim të tij, studenti do të rezultojë i pajisur me njohuri të thelluara përsa i përket arkitekturës së funksionimit të aktorëve të sistemeve të drejtësisë figurave të ndryshme të veprave penale nga më komplekset me të cilat përballet aktualisht realiteti shqiptar dhe ai botëror.