Analiza e ligjeve tregon se në disa raste, shumë nga dispozitat e tyre nuk kanë qënë në gjendje të arrijnë objektivat e tyre. Mungesa e efektivitetit dhe zbatueshmërisë së legjislacionit, vjen shpesh edhe si rezultat i mangësive në procesin e hartimit të ligjeve. Legjislacioni i hartuar keq pakëson sigurinë dhe stabilitetin ligjor. Në të njëjtën kohë, legjislacioni i hartuar keq mund të mos arrijë objektivat për të cilat është hartuar, mund t’i arrijë me një kosto tepër të lartë, ose mund të çojë në procese të kushtueshme gjyqësore si pasojë e teksteve ligjore të paqarta apo me hapësirë për interpretime subjektive. Në përgjithësi, legjislacioni i hartuar keq mund të krijojë vështirësi për t’u zbatuar pavarësisht vullnetit apo dëshirës së mirë. Në këtë kuadër përgatitja e jursitëve të aftë për hartimin e akteve ligjore është thelbësore. Kursi trajton disa nga çështjet kryesore që lidhen me përgatitjen e duhur të legjislacionit, sikurse janë teknikat e hartimit të ligjeve, kushtet dhe kufizimet ligjore që zbatohen në veprimtarinë legjislative dhe organizimin e punës që lidhet me hartimin e ligjeve, duke përfshirë çështjet institucionale dhe procedurale.

Kursi synon t’i njohë studentët me parimet e përgjithshme të hartimit të ligjeve, duke përfshirë kuadrin kushtetues dhe ligjor të hartimit të tyre; delegimin e kompetencave për të bërë akte ligjore; nevojën dhe justifikimin e ndërhyrjes legjislative dhe alternativat e mundshme; vlerësimin e efekteve dhe ndikimit të legjislacionit; si dhe kodifikimin. Studentët do të njihen gjithashtu me procedurën legjislative, duke përfshirë planifikimin dhe organizimin e hartimit paraprak të ligjeve; konsultimin e brendshëm dhe të jashtëm dhe përgjigjet legjislative si rezultat i këtij konsultimi; shqyrtimin e projektligjeve dhe paraqitjen e tyre në Kuvend; si dhe shpalljen, botimin dhe rishikimin në vijim të legjislacionit të nxjerrë. Një tjetër objekti i këtij kursi është njohja e studentëve me teknikat formale të hartimit të ligjeve, duke përfshirë strukturën e teksteve ligjore; sistemimin dhe renditjen e dispozitave të përgjithshme dhe rregullat për përgatitjen e relacioneve të projektligjeve. Kursi analizon gjithashtu, përgatitjen e legjislacionit vendas në lidhje me detyrimet ligjore ndërkombëtare, duke përfshirë hartimin e legjislacionit që lidhet me miratimin e marrëveshjeve ndërkombëtare; zbatimin në legjislacionin vendas të marrëveshjeve ndërkombëtare të detyrueshme për Shqipërinë dhe implikimet e lidhura me përafrimin e legjislacionit shqiptar me acquis communautaire të BE-së