Kreativiteti është diçka e gjallë, ecila vazhdon të evoluojë me ndryshimin e teknologjisë. Megjithatë, parimet themelore të kreativitetit mbeten të pandryshueshme. Dhe kjo është njohja e markës, e konsumatorëve dhe e mënyrës se si këto të dyja bashkëveprojnë. Kjo lëndë realizon një udhëtim në procesin krijues të zgjidhjes së problemeve për të bërë të mundur komunikimin e markave me target grupet e synuara prej tyre.. Një pjesë e rëndësishme e lëndës trajton se krijimi i një reklame efektive nuk është aq i thjeshtë sa mendohet. Ajo ka të bëjë me të kuptuarit se si marka e klientit tuaj përshtatet në jetën e audiencës së saj të synuar. Kursi i mendimit kreativ ofron një sërë mjetesh për të nxitur të menduarin krijues dhe paraqet një pasqyrë hyrëse të modeleve teorike të krijimtarisë. Mjetet e të menduarit krijuees dhe bazat teorike mundësojnë një sfond të nevojshëm për të përvetësuar lëndën. Përgjatë semestrit, studentëve do t’u mundësohen aktivitete të cilat nxisin të menduarin kreativ, në mënyrë që të aftësohen në zhvillimin e proceseve vetjake të mendimit krijues. Gjatë trajtimit të lëndës, studentët do të kuptojnë se suksesi i një fushate nuk varet nga sa shpenzohet për të por nga sa dini për markën dhe konsumatorin dhe sa mirë mund ta komunikoni këtë njohuri nëpërmjet kreativitetit.

Objektivat të cilat synohen të arrihen me realizimin e kësaj lënde janë: • Në përfundim të lëndës studentët do të jenë të aftë të shpjegojnë modelet teorike që drejtojnë procesin kreativ, gjithashtu të identifikojnë barrierat që limitojnë kreativitetin tek individë apo organizata. • Studentët do të praktikojnë të menduarin kritik dhe kreativ. • Nisur nga ky fakt, ato do të jenë në gjendje të analizojnë aftësitë e tyre kreative, të përkufizojnë mjetet e të menduarit kreativ si edhe të demostrojnë aftësitë e tyre në këtë fushë.