Metodat e Kërkimit dhe Shkrim Akademik pohon se në të vërtetë me anë të këtij përcaktimi kuptohet një teori e nyjëtuar, konceptet operative të së cilës përdoren për të nxënë njohuri që janë në funksion të zgjidhjeve të problemeve, të ndërtimit dhe përkufizimit të koncepteve për strategji zhvillimore, planifikim strategjik, për menaxhim efektiv. Metodat e Kërkimit dhe Shkrim Akademik ndihmojnë në përgatitjen e një punimi të mirë, që njëherazi mund të vlejë për të rifituar besimin në dobinë dhe vlerën përparimsjellëse të të studiuarit, të kuptuar jo thjesht si grumbullim të dhënash, por si përpunim kritik i një përvoje, si fitim aftësie (të vlefshme për të ardhmen) për të zbuluar problemet, për t`i trajtuar në mënyrë metodike ato dhe për t`i parashtruar sipas disa mënyrave komunikuese të caktuara. Ky kurs ligjëratash ka për qëllim të shpjegojë se si mund të kryhet një studim që mbështetet në metodën e duhur, duke dhënë kështu ndihmesë teoriko-kritike-analitike rreth dobisë së të marrit me studime, por dhe do të udhëzojë e ndihmojë lidhur me mënyrën se si mund të punohet një punim konkret. Thënë më shkurt, programi përmban sasi të mjaftueshme të materialeve teorike, për t`i dhënë rëndësi të veçantë punës praktike, nga e cila krijohet një bazament i qëndrueshëm për të ndërtuar intelektualisht.

Ky kurs ka si objektiva: • Të merren njohuri bazë mbi metodat e avancuara shkencore të kërkimit dhe shkrimit akademik • Të përvetësohen konceptet operative për të nxitur përvetësimin e njohurive që lidhen me kërkimin shkencor. • Të arrihet aplikimi i instrumenteve metodologjikë në punët kërkimore të studentëve. • Të mundësohen shqyrtimet teorike duke kaluar në veprime konkrete, në hulumtime dhe hartime të punëve profesionale, si një hap për të hyrë në brendinë e shkencës. • Të mundësohet veprimi origjinal dhe i pavarur në skicimin e ideve me performancë të dobishme për zhvillimin e tërësishëm të kulturës kërkimore, si parakusht i gjithë zhvillimeve të tjera.