Ekzekutimi i vendimit penal është faza përfundimtare e procedimit penal, por jo nga rëndësia. Ai është vazhdimi logjik i fazave të mëparshme dhe ka si qëllim vënien në zbatim të disponimeve të vendimeve gjyqësore, të cilat mund të materializohen si në vendimet e formës së prerë, por edhe në rastet e vendimeve, të cilat nuk janë të formës së prerë, por janë vendime gjyqësore penale me ekzekutim të menjëhershëm. Ekzekutimi është padyshim një element bazë i jurisprundencës, duke qenë se, për sa kohë ka një vendim penal gjyqësor, ka dhe një fazë ekzekutimi të këtij vendimi penal të dhënë nga gjykata. Me ekzekutim të vendimit penal kuptohet zbatimi i urdhërimeve që përmban vendimi penal i formës së prerë dhe i vendimeve që, sipas Kodit të Procedurës Penale, kanë ekzekutim të menjëhershëm, me synimin e riedukimit të të dënuarve, të rivendosjes së të drejtave të personave të proceduar padrejtësisht dhe të drejtave të subjekteve juridike të cenuara nga vepra penale, duke ndikuar në parandalimin e tyre.

Ekzekutimi i vendimeve penale ka për qëllim të shpjegojë, teorikisht dhe praktikisht procedurat e vënies në zbatim të vendimeve gjyqësore penale sipas llojeve te tyre. Studentëve do t’u shpjegohen mënyrat e ekzekutimit të vendimit penal, urdhri i ekzekutimit si instrument kryesor për vënien në ekzekutim. Gjithashtu do të trajtohet mënyra e vënies në ekzekutim të dënimeve alternative, shkaqet e shuarjes së ekzekutimit të dënimit, procedura e ekzekutimit të dënimeve me gjobë. Do të trajtohen kërkesat që lidhen me fazën e ekzekutimit të vendimit penal, rastet e shtyrjes së ekzekutimit të vendimit. Gjithashtu do të trajtohet mënyra e llogaritjes së kohës së dënimit, ekzekutimi i vendimeve me bashkim të dënimeve, teoritë dhe sistemet e dënimit. Një rëndësi të veçantë do t’u kushtohet dhe legjislacionit ndërkombëtar që rregullon ekzekutimin e vendimeve, siç është rasti i mbikëqyrjes së personave të dënuar ose të liruar me kusht të rregulluar nga Konventa Evropiane për mbikëqyrjen e personave të dënuar ose të liruar me kusht.