E Drejta Penale, Pjesa e Posaçme II, është vazhdim i së Drejtës Penale, Pjesa e Posaçme I. Ajo analizon dhe interpreton, në vijim, dispozitat e tjera të pjesës së posaçme të Kodit Penal të Republikës së Shqipërisë. Gjatë kursit studenti njihet në mënyrë të hollësishme me veprat penale kundër pavarësisë dhe rendit kushtetues, autoritetit të shtetit, krimet që cënojnë marrëdhëniet me shtetet e tjera, veprat me qëllime terroriste, veprat penale kundër drejtësisë, zgjedhjeve të lira, si dhe atyre të kryera nga organizata kriminale. Lënda ka në fokus të saj kryesor analizën e detajuar të elementëve të figurave të veprave penale të mësipërme. Për çdo figurë vepre penale analizohen në mënyrë të hollësishme objekti, elementët e anës objektive dhe anës subjektive, si dhe subjekti. Analiza dhe interpretimi i çdo vepre penale të parashikuar nga Kodi bëhet në lidhje të ngushtë me shembuj dhe raste të praktikës së përditshme gjyqësore.

E Drejta Penale, Pjesa e Posaçme II ka për qëllim të njohë studentin me veprimet dhe mosveprimet e parashikuara nga legjislatori si vepra penale. Gjatë trajtimit të lëndës studenti njihet me elementet e figurës së çdo vepre penale të përmendur më sipër, duke u aftësuar të përcaktojë drejt objektin, elementet e anës objektive dhe subjektive, si dhe subjektin për çdo vepër penale. Në përfundim të lëndës studenti do të jetë i aftë të bëjë interpretimin dhe analizën e dispozitave të pjesës së posaçme të Kodit Penal, si dhe do të jetë në gjendje të cilësojë drejtë figurën e veprës penale përkatëse në rastet e veprimve ose mosveprimeve të paligjshme.