E drejta familjare, trajton në mënyrë analitike e sistematike institutin e familjes dhe marrëdhëniet familjaro-juridike që rrjedhin prej saj, në mënyrë që të arrihet një trajtim njohës e shkencor i atyre problematikave që përbëjnë themelin e kësaj dege të së drejtës private. Ky kurs synon të pajisë studentin me njohuri të plota mbi fëmijët, amësinë, atësinë, përgjegjësinë prindërore dhe përgjegjësinë shoqërore mbi fëmijët. Lënda do të fokusohet në tema bashkëkohore që diskutohen kudo lidhur me mbrojtjen ligjore të fëmijëve duke evidentuar edhe problematikat që kanë lindur në shoqërinë shqiptare duke dhënë edhe zgjidhjet ligjore të parashikuara nga legjislacioni vendas dhe ndërkombëtar i ratifikuar nga Shqipëria. Po ashtu, ky kurs synon të informojë studentët me disa institute të rëndësishme si birësimi, kujdestaria etj.

Qëllimi dhe objektivi i kësaj lënde është aftësimi i studentëve në kuptimin e drejtë të marrëdhënieve ligjore familjare dhe interpretimin e normave dhe legjislacionit në fushën e së drejtës familjare. Kursi synon gjithashtu dhe edukimin për një kuptim të drejtë ligjor e shoqëror të marrëdhënieve prind- fëmijë apo shoqëri- fëmijë duke shprehur dhe shkeljet e ndryshme që ndodhin në këtë kuadër. Nëpërmjet studimit dhe diskutimit të kazuseve, studentët do të përgatiten për të argumentuar drejtë vendime gjyqësore, si dhe për t’i mbështetur ato në provat e administruara gjatë procesit gjyqësor.