Lënda “E Drejta Administrative” studion mënyrën e organizimit dhe rregullat bazë të funksionimit të administratës shtetërore gjatë progesit të vendimmarrjes dhe shqyrtimit të procedimeve administrative. Kjo lëndë studion elementet bazë të këtij procedimi duke dhënë koncepte të detajuara mbi mënyrën e veprimit, organizimin kolegjial, kuorumin gjatë shqyrtimit dhe vendimmarrjes, mënyrën e përfundimit të procedimit etj. Lënda është konceptuar të trajtojë pjesën e posaçme të së drejtës administrative. Në këtë mënyrë, fillimisht bëhet trajtimi i aktit administrativ duke analizuar formën, përmbajtjen dhe veçoritë e aktit. Më pas, lënda vijon me evidentimin e rasteve të vlefshmërisë dhe të pavlefshmërisë së aktit administrative, fuqinë juridike të aktit dhe pushimin e fuqisë juridike. Një rëndësi e veçantë në këtë lëndë i jepet edhe ankimit administrativ duke shpjeguar afatet dhe fazat kur mund të shqyrtohet ankimi administrativ. Krahas këtyre, lënda merret edhe me analizën e Ligjit për Gjykatat Administrative me qëllim identifikimin e ndryshimeve të reja ligjore.