Kursi “E drejtë romake” ofron njohuri të përgjithshme mbi të drejtën romake gjatë periudhës e cila njihet si periudha më e ndritur e zhvillimit të së drejtës. E drejta romake, si sistemi më i përparuar i së drejtës ka patur një rol të padiskutueshëm në evolucionin e mendimit dhe të koncepteve juridike. Në këtë kontekst, me anë të këtij kursi studentët do jenë të aftë të kuptojnë rëndësinë dhe ndikimin që ka patur e drejta romake në zhvillimin aktual të së drejtës. Ky kurs do të trajtojë fillimisht historikun e së drejtës romake, konceptet juridike themelore për të vazhduar më tej me çështje më specifike në fushën e të drejtave personale, të pronësisë si dhe të marrëdhënieve të detyrimit. Gjithashtu, do të trajtojë të drejtën e trashëgimisë si dhe procedurën civile në përgjithësi.

Ky kurs synon: 1. Të familjarizojë studentët me zhvillimin e së drejtës në kohën e Romës së Lashtë. 2. T’i njohë studentët me institutet kryesore të së drejtës të cilat kanë lindur që në periudhën e së drejtës romake. 3. T’i njohë studentët me mënyrën e organizimit juridik të shtetit më të zhvilluar skllavopronar siç ishte Roma. 4. T’i mundësojë studentëve mësimin e gjuhës juridike, pra terminologjinë që përdoret gjerësisht nga studiuesit e së drejtës. 5. Të shpjegojë rëndësinë dhe influencën e së drejtës romake. 6. Të shpjegojë integrimin e së drejtës romake në sistemet juridike aktuale kryesisht në familjen romano-gjermanike. 7. Të zhvillojë tek studentët mendimin kritik në analizimin e fakteve dhe marrëdhënieve të ndryshme juridike.