Njohuritë mbi origjinën e institucioneve dhe mbi zanafillën e së drejtës janë parë të domosdoshme nga studiuesit e së drejtës. Ky kurs trajton institucionet politike, sistemet kushtetuese, zhvillimin e institucioneve të së drejtës dhe të drejtat e lirisë përballë pushteteve politike, në një periudhë shume shekullore të historisë, nga Institucionet politike të Lindjes së Lashtë, rënia e Perandorisë Romake e deri në vendosjen e demokracise bashkëkohore, në një hapësirë të gjërë gjeografike dhe kulturore që përfshin Europën, Afriken, Azinë dhe Amerikën. Pra, do të ketë një trajtim të përgjithshëm mbi krijimin e institucioneve fillimisht në sistemin skllavopronar gjatë periudhës antike për të vazhduar më tej me sistemin feudal në kohën e mesjetës si dhe me kohën moderne bashkëkohore që përkoi edhe me revolucionet industriale që lindën në shtete të ndryshme. Me anë të këtij kursi, studentët do jenë të aftë të kuptojnë rëndësinë e zhvillimit gradual të institucioneve dhe të së drejtës në tërësi.

Ky kurs synon: 1. Të familjarizojë studentët me gjendjen e institucioneve të hershme juridike dhe politike në vende të ndryshme të botës, pra synon të hedhë dritë mbi mënyrën e strukturimit shtetëror që në antikitet. 2. T’i njohë studentët me transformimet që pësonin institucionet kryesore dhe normat juridike në periudha të ndryshme. 3. T’i njohë studentët me mënyrën e organizimit juridik të shtetit skllavopronar, feudal si dhe atij modern bashkëkohor. 4. T’i aftësojë studentët në arsyetimin dhe argumentimin e fakteve të ndryshme historike dhe sociale në konteksin ligjor. 5. Të shpjegojë influencën e shteteve të fuqishme në organizimin aktual që kanë shtetet në botë. 6. Të shpjegojë zanafillën si dhe rolin aktual të institucioneve. 7. Të zhvillojë tek studentët mendimin kritik për tema që kanë të bëjnë me mënyrën e organizimit të institucioneve aktuale në botë.