Kjo lëndë do të trajtojë aspekte etike të medias. Kursi do të ofrojë një panoramë të shkollave, ideve e pikëpamjeve etike si instrumente analitike për gjykimin e çështjeve të ndryshme, që përftohen nga mënyrat me të cilat mediat e ndryshme pasqyrojnë ngjarjet e ditës. Studentët do kenë mundësi të njihen me modele të gjykimit etik, me raste kombëtare dhe ndërkombëtare për analizë, me rëndësinë e qartësisë e saktësisë, me këndshikimet lidhur me të vërtetën dhe objektivitetin, me jetën private apo dukuritë e shfaqura në kushtet e mediave të reja.

Përmes orëve mësimore studentëve u jepet një panoramë e zhvillimit historik të etikës, shkollat dhe përfaqësuesit më në zë të saj. Pas prezantimit të koncepteve e termave kyç, fokusi i lëndës përqendrohet në procesin e vetërregullimit të medias në kushtet aktuale. Në lëndë flitet për rolin e medias në shoqëri, raportet me njerëzit e thjeshtë dhe politikën, për rolin e drejtuesve, redaktorëve, burimeve, për kodet etike, ndikimin e teknologjisë dhe mediat e reja. Gjatë orëve shtrohen kazuse nga praktika e medias dhe studentët ftohen të gjykojnë mbi to duke strukturuar arsyetimin e tyre etik. Inskenohen gjithashtu situata konkrete që imponojnë vendimarrjen nga ana e studentëve, të cilët sjellin argumentet e tyre për vendimet e mbi këtë bazë zhvillohet diskutimi në auditor.