Marketingu politik ka tërhequr vëmendjen për aplikim edhe të aktorëve politik në vitet e fundit edhe në Shqipëri. Rëndësia e marketingut politik bën që aktorët e politikës jo vetëm të veprojnë por edhe të mendojnë në termat e marketingut. Disiplina e marketingut inkurajon bizneset të kuptojnë klientët e tyre me qëllim që t’u sigurojnë atyre produktet dhe shërbimet e duhura. Në politikë, partitë dhe kandidatët janë përfaqësues të popullit, prandaj ato duhet të kuptojnë ose të paktën të zbulojnë çfarë dëshiron publiku në termat e politikave dhe lidershipit qytetar. Roli esencial i medias dhe roli në rritje i konsulentëve/ekspertëve në aplikimin e kësaj shkence hibride është tendencë gjithmonë e më në rritje në sferën politike dhe atë publike.