Kjo lëndë do të trajtojë aspekte etike të medias. Kursi do të ofrojë një panoramë të shkollave, ideve e pikëpamjeve etike si instrumente analitike për gjykimin e çështjeve të ndryshme, që përftohen nga mënyrat me të cilat mediat e ndryshme pasqyrojnë ngjarjet e ditës. Studentët do kenë mundësi të njihen me modele të gjykimit etik, me raste kombëtare dhe ndërkombëtare për analizë, me rëndësinë e qartësisë e saktësisë, me këndshikimet lidhur me të vërtetën dhe objektivitetin, me jetën private apo dukuritë e shfaqura në kushtet e mediave të reja.

Në këtë kurs synohet që studentët: -Të krijojnë një sistem gjykimi mbi vendimet etike në materialet gazetareske. - Të kuptojnë dhe njohin të gjitha zhanret e gazetarisë tradicionale dhe nevojat e audiencave për përmbajtje etike. - Të njohin dhe zhvillojnë njohuritë e tyre mbi zhvillimet e vazhdueshme të medias online. - Të aftësohen mbi mënyrat e përcjelljes së informacionit nëpërmjet shtypit të shkruar dhe medias online.