Lënda mëton të pajisë studentët me njohuritë e domosdoshme e me aftësitë praktike për zhvillimin e gjuhës dhe të shkrim-leximit në arsmin fillor. Lënda gjithashtu përmbledh studimet kryesore të kryera në fushat e të folurit, të dëgjimit, të leximit dhe të shkrimit. Studimet aktuale, praktika arsimore, dhe materialet mësimore do të analizohen në raport me pikëpamje të ndryshme teorike të gjuhës.

Ky kurs ka si qëllim aftësimin e studentëve në të kuptuarit e mënyrave se si zhvillohen aftësitë e përvetësimit të gjuhës tek fëmijët e arsimit fillor, duke i përgatitur ata kësisoj për profesinon e tyre të ardhshëm. Nëpërmjet kësaj lënde synohet të mësohen metoda e teknika bashkëkohore, për një mësimdhënie aktive e ndërvepruese, duke u bazuar tek karakteristikat moshore të fëmijëve të arsimit fillor. Gjatë këtij kursi studentët do të aftësohen për një mësimdhënie cilësore; do të zhvillojnë aftësitë profesionale që kanë lidhje me procesin e komunikimit si dhe me raportet midis të folurit të shkruarit dhe të lexuarit.